गांवा जातां अतां, तुम्हाविण मला येथें कोणी नाहीं ।
दृष्टी पाहिन कधिं फिरुन हे पाय अंबाबाई ? ॥धृ०॥
परवा जातां निघुनी, असें मी काल ऐकिले कांनी ।
सुमुहुर्तानें आहे उद्यांचा दिस मुक्काम प्रस्थानीं ।
निचिंत अजचि रात्र बोलते मी जोडूनया पाणी ।
सांगा आण वाहुन राजसा, याल कितिक दिवसांनी ? ।
कसें करून राहविते, परंतु भर देउन सार्‍यांनी ।
जायाचें ठरविलें, अतां तुजविण मी पडले रानीं ।
गेल्याचें सुखरूप लिहुन वर्तमान धाडा मजला
दुरावल्यामुळें पडल हा माझा विसर तुम्हांला
देहासहित हा प्राण सख्या, मी केला तुझ्या हवाला
कां वियोग योजिला ईश्वरें, हें मज न कळे कांहीं ॥१॥
जायाचें ऐकिल्यापासून दिनरात्र काळजी करिते ।
जेवणखाण विसरले, नाहीं मन माझें धंद्यावरते ।
कोठें अहा तुम्ही म्हणुन पहात मी नित्य घरामधें फिरते ।
न दिसासे जाहल्यावर अर्धे क्षणामधें घाबरते ।
अशि टाकुन येकली जातसा तुम्ही दुर देशावरते ।
पुढिल अठवून अंतरीं, अतांच मन गहिवरतें ।
पाहुन सख्या तुजकडे येतसे जळ माझ्या नेत्रांसी
राहिन येथें मी, परंतु माझा जिव लागेल तुजपाशीं
आणिक दु:ख मज नाहीं, मुख्य मी अंतरले पायांसी
आहे तशी यापुढें असुं द्यावी प्रीत माझे ठायीं ॥२॥
येवढा वेळ पतिराज गोष्टी मी ज्या ज्या सांगितल्या हो ।
हे बोल माझे अवघे आपल्या ध्यानांत असुं द्या हो ।
दिसगत जर लागली तुम्हांला निघुन यावयाला हो ।
मग मुळ शिबिका त्वरित पाठवुन मज तिकडे तरी न्या हो ।
सुखदु:खाचे मार्ग असे हे सर्व निर्मिले म्या हो ।
तरि येकहि प्रतिशब्द जिवलगा मशि बोला ना कां हो ? ।
प्रवासांत गेल्यावर येणें घडेल फार उशिरानें
घरिं नसल्यावर तुम्ही, राहुं मि कोणाच्या आश्रयानें ?
यावर सांगा, फिरुन आतां कधिं भेट होइल दुसर्‍यानें ?
कायावाचामन करुन हें हो लक्ष तुमचे ठायीं ॥३॥
नको चिंता सुंदरी करूं, तुं अवडतेस आम्हांला ।
शब्दगौरवें तुझ्या फार संतुष्ट सखे जिव झाला ।
थोडया दिवसांसाठी कष्टी कां करितेस मनाला ? ।
जाउन माघारें लवकर घरिं येतों सण शिमग्याला ।
नको मोठयानें रडुं प्रियकरे, डोळे पुस पदराला ।
उजाडलें बोलतां, आतां अम्ही जातों प्रस्थानाला ।
अति अवघड वाटतें, जा कसें मी हो म्हणावें अता ?
मिठी मारून पोटाशीं पतिला धरि कवटाळुन कांता
पाणी आलें डोळ्यांस उभयतां एकमेकांकडे पाहतां
पति उतरुन खालती आल्यावर पाईं ठेविली डोई ।
होनाजी बाळा म्हणे, कशि तरि चार दिवस उगी राही ॥४॥

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel

Books related to लावणी


चिमणरावांचे चर्हाट
नलदमयंती
सुधा मुर्ती यांची पुस्तके
श्यामची आई
झोंबडी पूल
सापळा
अश्वमेध- एक काल्पनिक रम्यकथा
गांवाकडच्या गोष्टी
खुनाची वेळ
अजरामर कथा
कथा: निर्णय
रत्नमहाल
लोकभ्रमाच्या दंतकथा
पैलतीराच्या गोष्टी
मृत्यूच्या घट्ट मिठीत